ஸ்ரீகுமாரின்- பத்து

1. சமீபத்தில் எப்போது மன்னிப்பு (sorry) கேட்டாய்? இல்லை கேட்டிருக்கலாம் என்று பின்பு தோன்றிய சம்பவம்?

மேடவாக்கம் ரோட்டில் இரு சக்கர வாகனத்தில் ஒரு நாள் செல்லும்போது ஒரு கார் மிக அருகில் வந்து ஒலிப்பானை அடித்து 'வெட்டி' திரும்பி சென்றது..வந்தது கோபம்! விரட்டி சென்று அடுத்த சிக்னலில் கார் சன்னல் அருகே சென்று "என்ன காரில் போகிற திமிரா?" என்று எகிறினேன். டிரைவர் பொறுமையாக சொன்னார் "உங்கள் வண்டியில் இருந்து பை விழபோகிறது என்று சைகைசெய்தேனே" என்று. திரும்பி பார்த்தேன்..விழுந்தே போயிருந்தது!! மன்னிப்பு கேட்கவே கூச்சமாக இருந்தது!!

2. தேர்தலில் ஓட்டு போட்டது உண்டா? இல்லை என்றால் ஏன் போடவில்லை என்று விளக்க முடியுமா? அப்படி ஓட்டு போடாத போது தேர்ந்தெடுக்கப்பட்ட அரசாங்கத்தை நீங்கள் விமர்சிப்பது சரியா?

இந்த முறை தவிர....திடீர் இடமாற்றத்தினால் ஊட்டி சென்றதால்! பேர் இல்லாமலோ, வேறு யாராவது ஓட்டு போட்டதாலோ சந்தர்ப்பம் கிடைக்காமல் போன ஒரு ஜீவன்!!

3. கடவுள் நம்பிக்கை உண்டா?

இல்லவே இல்லை!! உலகில் ஏற்ப்படும் நிகழ்வுகள் எல்லாவற்றையும் இரண்டாகப் பிரிக்கலாம்....ஒன்று..அறிவியல் விளக்கம் அறியப்பட்டது, இரண்டு.அறிவியல் விளக்கம் இன்னும் அறியப்படாதது!! தலை கருத்தை நான் இப்படிப் பார்க்கிறேன்...கடவுள் இருப்பதாக நினைப்பதால்தான் பலர் தவறு செய்கிறார்கள்...மன்னிப்பு கேட்டுக் கொள்ளலாம் என்ற நினைப்பில். Crusades காலத்தில், catholics சிலர் தாங்கள் வரும் நாட்களில் செய்யவிருக்கும் கொலைகளுக்கும், கற்பழிப்புகளுக்கும் , முந்தைய நாளே கடவுளிடம் பாவ மன்னிப்பு கேட்டு விடுவார்களாம். பி. கு.கடவுள் பக்தர்கள் யாரையும் புண்படுத்தும் எண்ணம் அறவே இல்லை...anticipatory மன்னிப்பு கேட்டுக்கொள்கிறேன்!!

4. வழகத்திகலிருந்து மாறுபட்டு எப்போதாவது எதையாவது புதிதாக முயற்சித்தது உண்டா?

ம்ம்ம்ம்.... இல்லை.....வழக்கமே (ஆராய்ச்சியும், publications) கொஞ்ச நாளாக செய்வதில்லை....நீதி மன்றம், தகவல் பெரும் உரிமை சட்டம் என்று திசை திரும்பியதால்!! இனிமேல் (இப்போது உள்ள) வழக்கத்துக்கு மாறாக மீண்டும் 'வழக்கத்தை' கடை பிடிக்கலாம் என்றுஇருக்கிறேன்!!

5. சமீபத்தில் எதாவது விளையாட்டில் (வீட்டுக்கு வெளியே) ஈடுபட்டது உண்டா? இல்லை என்றால் ஏன் விளையாட தோண்றவில்லை என்று யோசித்தது உண்டா?

ஆண்டவன் புண்ணியத்தில் (??!!) இப்பொழுதும் cricket ஆடுகிறேன்!! சென்ற மாதம் கூட ரெண்டு match ஆடினேன்...ஓடினேன்!!

6. கடைசியாக அழுதது எப்போது இல்லை மனம்விட்டு சிரித்தது??

அழுதது..(மனது கனத்தது) இன்று காலை....Coonoor அருகே யானை ஒன்று இறந்தது என்று அழைக்கப்பட்டேன். செங்குத்தான மலையிலும் யானை மிக லாகவமாக, ஒரு நடனக்கரியின் நளினத்துடன் கால் பிசகாமல் ஏறும். ஒரு தாய் யானை, தன் இரண்டு மாத குட்டி கால் சருக்கிய்தல் அதைக் காப்பற்ற பதறி ஓடி மலையில் இருந்து விழுந்து பரிதாபமாக இறந்தது!! கால் தவறிய குட்டி பாறை இடுக்கில் சிக்கி பிழைத்தது! அந்த பெண் யானையின் பிண பரிசோதனையை நான் அந்த இடத்திலேயே செய்தேன்....அது என்ன 'நினைத்திருக்கும்' தன் குட்டியை காப்பாற்ற ஓடி, தவறி விழுந்த அந்த நேரத்தில்? பாவம்...பாவம்...

சிரித்தது......அண்மையில் 11c மாணவர்கள் சந்திப்பில் Ramesh மற்றும் தினகர் அடித்த லூட்டியால்!!

௭. என்ன புத்தகம் படித்துக் கொண்டிருக்கிறீர்கள், இல்லை கடைசியாக படித்தது (பேப்பர்னு சொல்ல கூடாது)??

Paulo Coelho வின் 'The zahir' என்றும், என் மனைவி 'ehsaas' என்ற புனைப்பெயரில் 'வலையில்' எழுதும் கவிதைகள் என்றும் சொல்ல ஆசை. அனால் இல்லை!! இரண்டையுமே என் மனைவி எனக்கு படித்து சொல்வாள்...கேட்டுக் கொள்வேன். தற்பொழுது, பிரிவு 80 சிவில் procedure code படித்துக் கொண்டிருக்கிறேன் (Paper இல்லையே இது!!)

8.உங்களுக்கு ஏதாவது தனி திறமை இருக்கிறதா??

எல்லாரையும் எப்படியாவது எரிச்சல் அடைய செய்து விடுவேன்.....ஒரு நாளைக்கு 20 டீ, 15 வாழைப்பழம் சாப்பிடுவேன் !! (சும்மாக்காட்டியும்)

9. உங்களுக்கு பிடித்த சுற்றுலா தலம் (அ) போக விரும்பும் இடம் (அ) வீட்டிலிருந்து அதிக தூரம சென்ற இடம்??

சந்தேகமில்லாமல் Muktheshwar (உத்திரப்ப் பிரதேசத்தில் கால்நடை நச்சுயிரியல் (virology) பரிசோதனைக்கூடம் இருக்கும் ஸ்தலம் ).
வீட்டிலிருந்து அதிக தூரம சென்ற இடம்...Racine, Wisconsin...நான் மூன்று வருடம் தங்கியிருந்த Laurel, Maryland ஐ விட என் (தற்பொழுதைய) வீட்டில் இருந்து அது தூரம்!!

10. வாழ்வில் சந்தோஷம் என்பது?

கெட்டது செய்யாமல் வாழ்பவருக்கு, கெட்டது செய்யாமல் வாழ்வது!!